Нүүдэлчин Монголчуудын соёл, өв уламжлалыг үндэсний болон олон улсын хэмжээнд сурталчлан таниулах, соёлын аялал жуулчлалыг хөгжүүлэх, нүүдлийн соёл бүхий улс орнуудын соёлын хамтын ажиллагааг нэмэгдүүлэх, соёл хоорондын харилцан ойлголцлыг бэхжүүлэх чухал ач холбогдол бүхий “Нүүдэлчин” Дэлхийн соёлын фестивалийг 4 дэх удаагаа Улаанбаатар хотын Налайх дүүргийн 3 дугаар хорооны нутаг дэвсгэр Тайж хайрхны бэлд 2025 оны 08 дугаар сарын 21-24-ний өдрүүдэд зохион байгуулахаар төлөвлөн ажиллаж байна.

Хурлаар фестивалийн хүрээнд зохион байгуулах үйл ажиллагаа болон ерөнхий төлөвлөгөөний төслийг Засгийн газрын хэрэгжүүлэгч агентлаг Соёл, урлагийн газрын дарга Э.Цэнд-Аюуш танилцуулж, фестивалийн зохион байгуулалтын уялдаа холбоог хангах, үр дүнтэй зохион байгуулах талаар санал солилцов.

Энэ удаагийн фестивалийг Соёлын өвийг хамгаалах хуулийн дагуу соёлын биет бус өвийг хадгалж хамгаалах, түүнийг өвлөн уламжлагчийг тодруулах, алдаршуулах, авьяас билгийг хөгжүүлэх, олон нийтэд сурталчлан, түгээн дэлгэрүүлэх зорилгоор Олон улсын хэмжээнд зохион байгуулж буйгаараа  онцлог юм.

Фестивалийн хүрээнд:

• Соёлын биет бус өвийн оршин тогтнох чадварыг тогтоох соёлын биет бус өвийн үзлэгийг эрдэмтэн, судлаачдын оролцоотойгоор зохион байгуулах,

• 21 аймаг, нийслэлийн өртөө болон Соёлын биет бус өвийн өртөөг үзэгч зочдод зориулан зохион байгуулах,

• “Нүүдэлчдийн ертөнц: өнгөрсөн ба ирээдүй” олон улсын эрдэм шинжилгээний хурал зохион байгуулах;

• "Аялал жуулчдын сонирхлыг татахуйц, үндэсний болон орон нутгийн онцлог бүхий хоолны гудамжийг бий болгох;

• Үндэсний хэв маягийг шингээсэн талбайн тохижилттой амрах бүс байгуулж, үзэгч, жуулчдад зориулсан отоглох хэсэг бүхий тав тухтай орчныг бүрдүүлэх;

• Гар урлал, соёлын бүтээлч үйлдвэрлэлийн үзэсгэлэн, худалдаа зохион байгуулж, соёлын бүтээлч үйлдвэрлэл эрхлэгч иргэн, бизнес эрхлэгчдийг дэмжих;

• Олон нийтэд зориулсан медиа арт үзэсгэлэн, үзвэр, бүтээлүүдийг зохион байгуулах зэрэг арга хэмжээнүүдийг төлөвлөн ажиллаж байна.