Технологи, эдийн засгийн чиглэлээр дагнан бичдэг “Кварц” агентлаг Монгол Улсыг “Apple” компанийн үйлдвэртэй болох боломжит улсаар нэрлэлээ. Учир нь газрын ховор элемент болон ашигт малтмалын нөөцтэй Монгол Улсад тус компани үйлдвэрээ нээх нь алс хэтдээ ашигтай гэж дүгнэсэн байна. АНУ-Хятадын худалдааны дайнаас шалтгаалан Хятадын нутаг дэвсгэрээс “Apple” компани үйлдвэрээ гаргахаар төлөвлөж буй. Улмаар Энэтхэгт үйлдвэр барихаар төлөвлөж байгаа ч зардал ихтэйгээс гадна, түүхий эдийн тээврийн зардал мэдэгдэхүйц нэмэгдэх хандлагатай байна.

“Кварц” агентлагийн сэтгүүлч Кевин Уиллиамсын тодорхойлсноор “Монгол бол газрын ховор элементийн нөөц баялаг орон бөгөөд Apple компанийн түүхий эдийн 90 орчим хувийг энэ улсаас хангаж болно” гэж дүгнэжээ. Уг нийтлэлээс өмнө дэлхийн томоохон хэвлэл мэдээллийн агентлагууд Монгол Улсыг эрчим хүчний үнэ бага, томоохон хоёр хөршийн дунд оршдог байршлыг харгалзаж үзвэл томоохон компаниуд үйлдвэрээ байгуулах боломжтой гэж дүгнэсэн. Өмнөд Солонгосоос Монгол Улсад суугаа Элчин сайд ч ийм боломж байгаа тухай өнгөрсөн сард өгсөн ярилцлагадаа онцолсон билээ.

Кевин Уиллиамс сэтгүүлч Монголоос гадна Тайвань, Герман, Чили, Япон зэрэг есөн улсыг үйлдвэр байгуулах боломжит улсын тоонд багтаажээ.