Улаанбурхан өвчний нөхцөл байдлын талаар Халдвар Өвчин Судлалын Үндэсний Төвөөс өнөөдөр мэдээлэл өглөө.

ХӨСҮТ-ийн Ерөнхий захирал Э.Анхбаяр "Хоёрдугаар сарын 18-нд улаанбурхан өвчний тохиолдол бүртгэгдсэнээс хойш тохиолдлын удирдлагын тогтолцоо идэвхжин, эрчимтэй ажиллаж, тандалт хариу арга хэмжээг авч байна. Энэ хугацаанд 1,756 тохиолдол бүртгэгдсэнээс 1,199 нь эдгэрсэн. Улсын хэмжээнд 11 аймагт улаанбурхан өвчин бүртгэгдсэнээс нийслэлд 73 хувь нь бүртгэгдсэн байна. Одоогийн байдлаар ХӨСҮТ 264 хүн хэвтэн эмчлүүлж байгаа.

Харамсалтай нь улаанбурханаар оношлогдсон дөрвөн сартай хүүхэд өнөөдөр эндлээ. Ар гэрийнхэнд нь гүн эмгэнэл илэрхийлье. Хүүхдийн биеийн байдал тун хүнд ирсэн. 2-3 эмнэлэг дамжсан, сар гаруй хатгалгаатай явсан байсан.

Сүүлийн өдрүүдэд улаанбурхан өвчний тохиолдол нийслэлд нэлээд нэмэгдэж байгаа.  ХӨСҮТ-ээр үйлчлүүлж байгаа иргэдийн тоо эрс нэмэгдэж байна. Дунджаар 200 орчим үйлчлүүлэгч ирж үзүүлдэг байсан бол одоо хоногтоо 350 хүн ирж үзүүлж байна.

Улаанбурханы дэгдэлт ихэссэнтэй холбоотойгоор дархлаажуулалтын нас нь болоогүй хүүхэд өвдөх эрсдэл өндөр байна. Архаг хууч өвчтэй хүүхэд эндэх эрсдэл гарахыг үгүйсгэхгүй. Иймд эцэг эх, ард иргэд та бүхэн дархлаажуулалтдаа сайн хамрагдана уу" гэлээ.