УИХ-ын чуулганы өнөөдрийн нэгдсэн хуралдаанаар гадаадын иргэнд газрыг 100 жилээр эзэмшүүлэх заалтыг Хөрөнгө оруулалтын тухай хуулиас хасахыг гишүүдийн олонх дэмжиж баталлаа. Хуралдаанд оролцсон 49 гишүүнээс 44 нь дэмжиж нийт 89.8% саналаар Хөрөнгө оруулалтын тухай хуулиас уг заалтыг хаслаа.

УИХ-ын дарга Г.Занданшатар хэлэхдээ “Иргэд төрийн үйл хэрэгт шууд оролцох эрхээ УИХ-аар дамжуулан эдлэх Үндсэн хуулийн заалтыг хэрэгжүүлж, УИХ-ын нийтийн өргөдлийн цахим системийг нэвтрүүлсэн. 100 мянган иргэний дэмжлэг авсан санал түүхэндээ анх удаагаа хууль болон батлагдаж байна” гэсэн юм.

Хөрөнгө оруулалтын тухай хуульд хөрөнгө оруулагчид үзүүлэх татварын бус хөрөнгө оруулалтын дэмжлэгийн нэг хэлбэр болох газрыг 60 хүртэл жилээр гэрээний үндсэн дээр эзэмшүүлэх, ашиглуулах уг хугацааг гэрээний анхны нөхцөлөөр нэг удаа 40 хүртэл жилээр сунгах зохицуулалтыг тусгасан заалт хасагдлаа.