Нийгмийн даатгалын ерөнхий газрын даргын зөвлөлийн ээлжит хурал 2025.04.29-ний өдөр боллоо. Хурлаар “Нийгмийн даатгалын сангийн чөлөөт үлдэгдлийг Засгийн газрын үнэт цаасанд хөрөнгө оруулах тухай” асуудлыг танилцууллаа.  

Нийгмийн даатгалын ерөнхий хууль болон Засгийн газрын 2024 оны 254 дүгээр тогтоолоор баталсан холбогдох журамд нийгмийн даатгалын сангийн чөлөөт үлдэгдлийг найдвартай, үр өгөөжтэй, ил тод, хараат бус байх зарчмыг баримтлан Засгийн газрын үнэт цаас, Монголбанкны үнэт цаас худалдан авах, Төрийн сангийн нэгдсэн дансанд байршуулах мөнгөн хадгаламж, банкны системд нөлөө бүхий арилжааны банканд мөнгөн хадгаламж хэлбэрээр байршуулах гэсэн 4 төрлийн санхүүгийн хэрэгсэлд хөрөнгө оруулахаар хуульчилсан.

Энэ хүрээнд Нийгмийн даатгалын сангийн 2025 оны төсвийн тухай хуульд заасны дагуу Засгийн газар болон Монголбанкны үнэт цаас авахад зарцуулах хөрөнгийн дээд хэмжээг 300.0 тэрбум төгрөг байхаар тогтоосон. Иймд нээлттэй арилжаанд ороход шаардлагатай үнийн тооцоолол, бусад шаардлагатай судалгааг Нийгмийн даатгалын үндэсний зөвлөлийн дэргэдэх Мэргэжлийн хороогоор хийлгэх шийдвэрийг Даргын зөвлөл гаргалаа.

Нийгмийн даатгалын байгууллага өнгөрсөн онд сангийн чөлөөт үлдэгдлийг санхүүгийн найдвартай хэрэгсэлд оруулах, өсгөн нэмэгдүүлэх зорилтын хүрээнд 300.0 тэрбум төгрөгөөр Засгийн газрын бонд авч, сангийн хөрөнгийг 55.5 тэрбум төгрөгөөр нэмэгдүүлэх боломжийг бүрдүүлсэн.

Мөн Мэргэжлийн хороо, Олон нийтийн хяналтын зөвлөлөөс гаргасан дүгнэлтэд үндэслэн Нийгмийн даатгалын үндэсний зөвлөлийн шийдвэрээр нийгмийн даатгалын сангийн чөлөөт үлдэгдэл 700 тэрбум төгрөгийг Монголбанкнаас тодорхойлсон системийн нөлөө бүхий арилжааны 4 банканд хугацаатай хадгаламж хэлбэрээр байршуулахаар ажиллаж байна.