Ковид-19 цар тахлын дараа халдварын голомт болоод байсан БНХАУ даяар, Европ тивийн хэд,хэдэн улсад хөхүүл ханиалганы тохиолдол эрс нэмэгдээд байна.

БНХАУ-ын Үндэсний өвчнийхяналт, урьдчилан сэргийлэх газрын мэдээлснээр он гарснаас хойш эхний хоёр сард хөхүүл ханиадны тохиолдол 20 дахин нэмэгджээ. Одоогоор Хятад даяар 32380 тохиолдол бүртгэгдсэнээс, шинж тэмдэг хүнд байсан 13 өвчтөн эндсэн байна. БНХАУ-ын хувьд нярайн товлолт вакцинд сахуу татрангийн вакцин багтдаг тухайн хүүхэд томрох тусам вакцины нөлөө сулардаг гэж мэргэжилтнүүд дүгнэжээ. Ханиадны тоо эрс нэмэгдсэнтэй холбоотойгоор БНХАУ-ын Өвчний хяналт, урьдчилан сэргийлэх газрын дарга Шен Хунбин вакциныг шинэчлэх, дархлаажуулалтын хөтөлбөрийг дахин батлах эсэхийг хэлэлцэж байж шийднэ гэж мэдэгдэж байсан юм. Тус улсад 2023 оны сүүлээс эхлэн хөхүүл ханиадны тоо нэмэгдэж эмнэлгийн ачаалал дээд цэгтээ тулсан тухай барууны улс орнууд мэдээлж байсан юм.

Зөвхөн Хятад даяар бус Европ тивийн тэр дундаа баруун европын хэд, хэдэн улсад ч мөн адил хөхүүл ханиадны тоо эрс нэмэгджээ. Европын эрүүл мэндийн байгууллагын мэдээлснээр 2023 оны дунд үеэс эхлэн Бельги, Хорват, Дани, Испани, Швед, Норвеги зэрэг улс орнуудад хөхүүл ханиадны тохиолдол эрс нэмэгдсэнийг анхааруулж байсан юм. Он гарснаас хойш Нидерланд, Чех улсад ч хөхүүл ханиадны тохиолдол эрс нэмэгджээ. Тухайблал Чех улсад дэгдсэн хөхүүл ханиадны тохиолдол 1960 оноос хойш түүхэн дээд хэмжээнд хүрсэн бол Испани улсад өмнөх оныхтой харьцуулахад 1200 гаруй тохиолдлоор тус тус нэмэгдээд байна. Нидерланд болон Грек улсад хөхүүл ханиад нярайд илүү хүнд тусаж байгааг онцолж байсан юм.

Хөхүүл ханиадны дэгдэлт 3-5 жил тутам сэргэдэг гэх эмнэл зүйн судалгаа байдаг. Гэвч ковид-19 цар тахлын үед европ болон дэлхий даяар хөхүүл ханиадны тохиолдол бараг бүртгэгдээгүйг Европын эрүүл мэндийн байгууллага онцолжээ. Цар тахлын дараа Европ тив, Төв Азийн улс орнуудын хувьд ханиалганы вакцинжуулалт саарсан нь хөхүүл ханиад нэмэгдэх гол шалтгаан болсон гэж ДЭМБ-аас дүгнэсэн байна.

ДЭМБ-ын зөвлөмжид дурдсанаар Төв Ази болон Азийн ихэнх нутаг,  Европ тивийн улс орнуудад хөхүүл ханиадны тохиолдол эрчимжих хандлагатай байгаа тул вакцинжуулалтын бодлогодоо анхаарах, эрүүл мэндийн үзлэг эмчилгээнд анхаарахыг зөвлөсөн юм.

Эх сурвалж: TIME | Euronews