Мексикийн Засгийн газар дунд болон ахлах сургуулийн орчинд хэт давстай, хэт чихэрлэг амттан худалдахыг хориглох шийдвэр гаргалаа. Засгийн газрын тус шийдвэр өнгөрсөн сарын сүүлээр хэрэгжиж эхэлсэн байна. Тус улсад бага насны хүүхдүүдийн дунд халдварт бус өвчин тэр дундаа зүрх судас, дотор эрхтний өвчлөл нэмэгдэж, таргалалтын түвшин өндөр байгаа тул дээрх шийдвэрийг гаргажээ.

Шинэ журмын дагуу сургуулиуд үдийн хоолондоо давс, элсэн чихэр, илчлэг, өөх тос ихтэй хоол хүнснээс мөн татгалзах үүрэг хүлээж байгаа юм. Мексик улс нь 2020 оноос эхлэн давс, чихэр ихээр агуулсан бүтээгдэхүүний нүүрэн талд анхааруулах шошго хадаж эхэлсэн байна. 

Тус улсын Нийгмийн эрүүл мэндийн хүрээлэн 2024 оны есдүгээр сард бага насны хүүхдүүдтэй холбоотой нэгэн удирдамж нийтэлсэн байдаг. Тус удирдамжид жимсний шүүс, чихэрлэг ундаа, савласан чипс, гахайн махан ороомог, шар буурцагны амттан, самран бүтээгдэхүүн нь хүүхдийн таргалалт, эрүүл мэндэд шууд нөлөөлж байгаа гэж дүгнэсэн юм.