Үндэсний статистикийн хороонд мэдээлэлд дурдсанаар он гарснаас хойш эхний хоёр сарын байдлаар улсын хэмжээнд 405.3 мянган хүн өндөр настны тэтгэвэр авчээ. Энэ нь өнгөрсөн оны мөн үетэй харьцуулахад 3.7% өссөн үзүүлэлт аж. Энэ хугацаанд 405.3 мянган хүнд нийт 724.5 тэрбум төгрөгийг тэтгэвэрт олгожээ. Олгосон мөнгөний хэмжээ ч нэмэгдсэн байна. Өнгөрсөн оны мөн үетэй харьцуулахад 29.7% өссөн байна. Энэ оны төсөвт Нийгмийн даатгалын тэтгэврийн сангаас нийт 5.3 их наяд төгрөг тэтгэвэрт олгохоор тусгаад буй.

Нийгмийн даатгалын сангаас олгох тэтгэврийн тухай хуульд хэд, хэдэн заалт бий. Тухайлбал “Тэтгэвэр авагчийн тэтгэврийн хэмжээг өмнөх оны инфляцын жилийн дундаж түвшинтэй уялдуулж жил бүрийн нэгдүгээр сарын нэгний өдрөөс эхлэн нэмэгдүүлнэ” гэж заасан бий. Хуулийн дагуу тэтгэврийн доод хэмжээг шинэчлэн тогтоож, одоо 505 мянган орчим тэтгэвэр авагчийн тэтгэвэрийн хэмжээг зургаан хувиар нэмэгдүүлээд байна. Ингэснээр дундаж тэтгэврийн хэмжээ 8478 мянган төгрөг болж нэмэгдээд байгаа билээ. Өөрөөр хэлбэл нийгмийн даатгалын сангаас олгох бүрэн тэтгэврийн доод хэмжээг 689 мянган төгрөг, нийгмийн даатгалын сангаас олгох хувь тэнцүүлэн тогтоосон тэтгэврйн доод хэмжээг 572.4 мянган төгрөгөөр шинэчлэн тогтоогоод байгаа юм.

НҮБ-ын хүн амын судалгаагаар Монгол Улсад нийт хүн амд эзлэх ахмад настнуудын хувь хэмжээ нэмэгдэж байгаа. Иймийн тул тэтгэврийн тогтолцоог шинэчлэн, хагас хуримтлалын тогтолцоо руу үе шаттай шилжих, олон давхаргат тэтгэврийн тогтолцоог нэмэгдүүлэхийг зөвлөсөн нь бий.