Урлаг, соёлоор дамжуулан хөгжлийн бэрхшээлтэй хүний нийгмийн оролцоог нэмэгдүүлэх, тэгш хамруулах боловсролыг дэмжих зорилгоор Боловсролын яам, Боловсролын ерөнхий газар, "Энэрэл" мэргэжлийн боловсролын сургууль, Олон улсын сүлжээ “Ловинг Хат” ресторантай хамтран хөгжлийн бэрхшээлтэй уран бүтээлчдийн "ХАЙРЫН ӨНГӨ" уран бүтээлийн үзэсгэлэнг 04 дүгээр сарын 03-аас 05-ны өдрүүдэд Монголын театрын музейд үнэ төлбөргүйгээр олны хүртээл болгож байна.

 

Энэхүү үзэсгэлэнд уран бүтээлээрээ олонд танигдсан уран сийлбэрч СТА Б.Гонгор, зураач Б.Хувьт болон Ражив Гандийн нэрэмжит Үйлдвэрлэл, урлалын политехник коллеж, Анима дүрслэх урлагийн политехник коллеж, Сэргээн засах сургалт, үйлдвэрлэлийн төв, “Энэрэл" мэргэжийн боловсролын сургуулийн суралцагч, төгсөгчид, хөгжлийн бэрхшээлтэй уран бүтээлчдийн бүтээлийн дээжээс толилуулж байгаа юм.

Үзэсгэлэнд тавигдсан бүтээлүүдийг худалдан авах боломжийг олгох ба нэг уран бүтээлчийн бүтээлийг онцлон дуудлага худалдаагаар худалдаалах юм.

 

Гэр бүл, хөдөлмөр нийгмийн хамгааллын яам, Хөгжлийн бэрхшээлтэй хүний хөгжлийн ерөнхий газар, Монголын Аутизмын холбоо, Монголын органик хүнсний ногоон холбоо, Монфүүдланд ХХК байгууллагууд мөн дэмжин оролцож байна.