Улсын Их Хурлын гишүүн, Засгийн газрын гишүүн, Эрүүл мэндийн сайд Т.Мөнхсайханы санаачилгаар эрүүл мэндийн тусламж үйлчилгээний чанар, хүртээмжийг сайжруулах, төвлөрлийг сааруулах төсөл”-ийг орон нутагт хэрэгжүүлж эхэлсэн билээ.

 

Төслийн хүрээнд энэ сарын 4-ний өдрөөс эхлэн Гэмтэл согог судлалын үндэсний төвийн эмч нарын баг Баянхонгор аймагт ажиллаж, орон нутгийн иргэдэд гэмтэл согогийн яаралтай болон төрөлжсөн нарийн мэргэжлийн тусламж үйлчилгээ үзүүлж буй юм.

 

Тус баг бүрэлдэхүүнд ГССҮТ-ийн салбар эмнэлгийн Ясны эмгэгийн мэс заслын тасгийн их эмч Ц.Батбаяр, Толгойн мэс заслын тасгийн их эмч А.Чинцэцэг, Хүүхдийн мэс заслын тасгийн их эмч О.Бат-Эрдэнэ, салбар эмнэлгийн Түлэгдлийн төвийн их эмч Д.Жүгдэрнамжил, Гэмтэл согогийн үндсэн мэргэжлийн 2-р курсын резидент эмч Я.Ганхуяг, Д.Цэрэнтогтох нар багтсан байна.

 

Эмч нарын баг 14 хоногийн хугацаанд нийт 132 хүнд үзлэг, оношилгоо хийсэн бөгөөд яс үений эмгэг, мөчдийн хугарал болон толгой, хүзүү, нурууны гэмтлийн мэс заслыг 22 үйлчлүүлэгчид хийжээ.

 

Мөн тус аймгийн Жинст сумын 60 иргэнийг үзлэгт хамруулж, 54 хүнд рентген шинжилгээ хийсэн бол, Шаргалжуут тосгоны 59 иргэнийг үзлэгт хамруулж, 47 хүнд рентген шинжилгээ хийж, онош тодруулан эмчилгээнд хамруулсан байна. Эдгээр үйлчлүүлэгчдээс 58 хүнд гэмтэл согогийн төлөвлөгөөт мэс засал хийхээр төлөвлөсөн аж.

 

Жилийн хугацаанд үргэлжлэх уг төслийн хүрээнд ГГСҮТ-өөс нийт 11 баг хуваарилагдан ажиллах бөгөөд аймгийн удирдлагууд болон ГССҮТ-ийн Эмнэл зүй хариуцсан дэд захирал Л.Дагвадорж тэргүүтэй эмч нарын хамтарсан уулзалтаар тусламж үйлчилгээнд нэн шаардлагатай тоног төхөөрөмжийг шийдвэрлэсэн байна гэж ГССҮТ-өөс мэдээллээ.