Дональд Трамп өчигдөр тангараг өргөж, АНУ-ын 47 дахь Ерөнхийлөгч болохтой зэрэгцэн Мексикийн хил дээр онц байдал зарласан талаар олон улсын хэвлэлүүд дамжууллаа. Учир нь, хоёр дахиа Ерөнхийлөгчийн бүрэн эрхийн хугацаа нь хэрэгжиж эхэлсэн Д.Трамп өмнө нь барьж байсан цагаачлалын эсрэг хатуу бодлогоо үргэлжлүүлж, улам чанга төлөвлөгөө хэрэгжүүлнэ гэж амласантай холбоотой юм. Төлөвлөгөөний дагуу АНУ-д хууль бусаар амьдардаг гадаадын иргэдийг бөөнөөр нь албадан гаргах учир Мексикийн Засгийн газар хил дээр хэт олны давалгаа бий болж мэдэх учир хил орчимд байрлах Тихуана хотод онц байдал зарлах шийдвэр баталсан байна. АНУ-ын Калифорнийн Сан Дьего хоттой залгаа орших уг хотод цагаачдыг хүлээн авахад бэлдэж, 30 гаруй түр хоргодох байр байгуулж, бэлэн байдалд шилжжээ. Гэсэн ч орон зай, хангамж зэрэг наад захын хэрэгцээ хангагдаагүй гэж хүмүүнлэгийн байгууллагууд анхааруулсан байна.

Жардин Де Лас Марипосас түр хоргодох байр хариуцсан захирал Жейми Марин Д.Трампын бөөнөөр албадан гаргах бодлогын уршигаар АНУ-ыг зорих болон тэндээс буцаж ирэгчдийн тоо асар богино хугацаанд хэт олширч хүмүүнлэгийн хямрал үүсэхэд хүргэх аюултайг учирлав. Нөхцөл байдал хэрхэн эргэхийг таамаглах бололцоогүй учраас сэтгэл санааны бэлтгэлтэй байхыг хүмүүнлэгийн байгууллагуудаас анхааруулжээ.