БНХАУ-д өргөн хүрээнд дэгдээд байгаа HMVP вирусийн талаарх мэдээллийг манай улсын онцгой байдал, эрүүл мэндийн байгууллагынхан өчигдөр хийсэн. Уг вирус одоогийн байдлаар урд хөршийн хойд нутгуудаар дэлгэрснээс гадна Энэтхэгийн Карнатака мужид хоёр тохиолдол илэрсэн талаар тус улсын Эрүүл мэндийн яамнаас мэдээлсэн. Хөрш зэргэлдээ хоёр орны нөхцөл байдал ийм байхад манай улсад одоогоор HMVP вирусийн тохиолдол илрээгүй ч тандах, судлах, шинжлэх ажлыг тогтмол зохион байгуулж байгаа.

Энэ вирус корона вирусаас юугаараа ялгаатай вэ гэвэл хүн төрөлхтний хувьд цоо шинэ зүйл биш бөгөөд хэдэн зуун, мянганы тэртээгээс нийтийн дунд үе, үе голомтлон дэгдэж байсан түүхтэй. HMVP буюу хүний метапневмовирус нь ханиалгах, найтаах үед үүсэх дусал эсвэл аэрозолоор дамжихын зэрэгцээ халдвартай хүнтэй ойр дотно харьцах, вирусийн бохирдсон орчинтой харьцах замаар дамжих боломжтой. Бага насны хүүхэд, дархлаа сул, өндөр настай хүмүүс хэт мэдрэмтгий байдаг тул амны хаалт зүүж, гараа тогтмол савандаж угаах, спиртын найрлагатай ариутгагч хэрэглэх зэргээр урьдчилан сэргийлэх арга хэмжээ авахыг эмч, мэргэжилтүүд зөвлөж байна. Мөн бусад төрлийн амьсгалын замын вирустай хавсарч илүү хүндэвтэр байдлаар өвчлөхийг анхаарууллаа.

Хятадын эрүүл мэндийн байгууллагаас энэ вирус нь түгээмэл тохиолддог, энгийн ханиад маягийн шинж чанартай гэсэн ч олон улсын хэвлэлүүүдээр гарч буй мэдээллүүдээс харахад таван жилийн өмнө дэлгэрч долоон сая хүний аминд хүрсэн корона вирустай адил шинж тэмдэг илэрч, ихэнх тохиолдолд уушгины хатгалгаа болон хүндэрч байна. HMVP вирус нь ариун цэвэр үл сахих, вирусаар бохирдсон орчинтой хүрэлцэх төдийд халдварлаж, богино хугацаанд сая, сая хүнд халдварлах магадлал өндөр тул дэлхий даяараа аюулын харанга дэлдэж байна. Урд хөршийн эрх баригчид хойд нутгаар олон тооны хүн HMVP вирусийн халдвар авсан гэж мэдээлсэн ч нарийн тоо гаргасангүй. Онлайнд тарсан зураг, бичлэг, мэдээллээс харахад уг вирус илэрсэн бүсүүдийн эмнэлэгүүд ачааллаа дийлэхээ больсон нь тодорхой харагдаж байгаа юм.

Анх 2001 онд Нидерланд улсад уг вирусийг таньж, HMVP гэж нэрлэснээс хойш эрдэмтэд нэлээд сайн судалсан боловч одоогийн байдлаар эмчилгээний арга боловсруулж, түүнийг эсэргүүцэх вакцин гаргаж авч чадаагүй л байна. Иймд олон улсын зүгээс урьдчилан сэргийлэх зөвлөгөө өгөхөөс өөр аргагүй байдалтай байгаа юм. Сүүлийн хорь гаруй жилд хийсэн судалгаанаас үзэхэд дэлхий дээр байгаа хүмүүс амьдралдаа ядаж нэг удаа HMVP вирусээр халдварлаж байсан учир сүргийн дархлаа тогтож, хүндэрдэггүй. Бодит байдал дээрх халдварын ийм байтал БНХАУ-д өргөн хүрээнд тархаж байгаа нь уг вирусийг анхааралдаа авахаас өөр аргагүй байдалд хүрч байна гэж Австралийн Флиндерсийн их сургуулийн Др. Жакелин Стефенс учирлалаа.

Хэрэв өвчтөнд корона вирустай адил өндөр халуурах, уушгаар хатгуулах, амт, үнэр мэдрэхээ болих, толгой өвдөх зэрэг шинж тэмдэг илэрвэл яаралтай өөрийгөө тусгаарлаж, мэргэжлийн байгууллагад хандахыг дэлхий даяар зөвлөж байна.