НИТХ-аас өнгөрсөн хоёрдугаар сард тогтоол гаргаж, нийтийн тээврээр үйлчлүүлэх үнийн тарифт зарим өөрчлөлтийг оруулсан.  Энэ талаар Нийтийн тээврийн бодлогын газрын дарга Д. Отгонжаргал мэдээлэл өглөө. Тэрбээр “НИТХ-аас өнгөрсөн хоёрдугаар сард тогтоол гаргаж, нийтийн тээврээр үйлчлүүлэх үнийн тарифт зарим өөрчлөлт оруулсан.

Уг тогтоолын дагуу 2025 оны нэгдүгээр сарын 1-нээс иргэд 1,000 төгрөг төлж, нийтийн тээврийн автобусаар зорчихоор болсон байна. Тогтоолыг 2025 оны нэгдүгээр сарын 1-нээс хэрэгжүүлэхээр ажиллаж байна.

2014 онд нийтийн тээврийн үйлчилгээний тарифыг 500 төгрөгөөр тогтоож байсан. Үүнээс хойш 10 жилийн дараа автобусаар зорчих үнийг нэмж байна. Улаанбаатар хотод 30 минутын дотор дараагийн автобусанд дамжин суухад төлбөргүй байдаг байсан.

Харин  2025 оны нэгдүгээр сарын 1-нээс хэрэгжих шинэ журмаар өдөрт гэсэн зохицуулалт орж байгаа. Нийтийн тээврийн үйлчилгээнд зориулагдсан карт буюу U money карттай иргэн 1,000 төгрөгөөр 06:00-23:00 цагийн хооронд дөрвөн удаа зорчино” гэв.