Арменийн эрх баригчид 2022 оны тавдугаар сард хөөргөсөн “АрмСат-1” хиймэл дагуулын төсөл болон хөөргөхтэй холбоотой үйл ажиллагаанд шалгалт хийж эхэлжээ. Учир нь төслийн үйл ажиллагааны явцад санхүүгийн буруу менежмент, авлига орсон байж болзошгүй байна. Өнгөрсөн онд дээрх төслийн хоёр дахь хиймэл дагуул хөөргөсөн бөгөөд нийт хөрөнгө оруулалт 7 сая ам.доллароор хэмжигдэж байгаа юм.

Хиймэл дагуулыг Испанийн “Сатлантис” фирмтэй хамтран бүтээж, АНУ-ын Флорида мужийн хөөргөх талбайгаас “SpaceX” компанийн пуужингаар хөөргөжээ. Тухайн үед Арменийн Ерөнхий сайд Никол Пашинян “хилийн хяналт, гамшгийн удирдлага, геологийн судалгаанд ихээхэн ач холбогдолтой” гэж байсан ч үр дүн нь гараагүй байна. Тиймээс санхүүгийн ил тод байдал, төслийн үр нөлөөг шалгах шаардлагатай болжээ. Арменийн Авлигатай тэмцэх хороо, Прокурорын газраас мөрдөн шалгах ажиллагаа эхэлснийг баталсан ч тодорхой мэдээллийг улсын нууцтай холбоотой учир мэдээлэх боломжгүй гэжээ.