Халуун орны чийглэг, дулаан уур амьсгал, өвөрмөц тогтоц бүхий үзэсгэлэнт байгаль, хэрэглээний хямд өртөгтэй гэдгээрээ сая, сая жуулчныг урин дууддаг Лаос улсад аялахдаа анхаарал, болгоомжтой явахыг олон улсад анхааруулж эхэллээ. Учир нь, тус улсын төвийн Ван Вьен гэх жижигхэн хотод энэ сарын дундуур Австрали, АНУ, Данийн зургаан жуулчин согтууруулах ундаанд хордож, амиа алдсан харамсалтай хэрэг өнгөрсөн долоо хоногт ил болж, өнөөдөр ч дэлхий даяар дуулиантай яригдсаар байна.

Хэргийг тодруулбал, дээрх хэргийн гол шалтгаан нь метилийн спиртээр үйлдвэрлэсэн согтууруулах ундаа. Орон нутгийн наймаачид хуурамч архи үйлдвэрлэхдээ согтууруулах үйлчилгээг нь өндөрсгөхийн тулд үйлдвэрийн зориулалттай метилийн спиртээр найруулчихдаг аж. Ерөнхийдөө, Лаост “tubing” гэх жуулчдад зориулсан согтууруулах ундааны багц хямд үнээр зардаг ба зугаа цэнгэл хайн тэнд очсон залуу жуулчид ихээр авч хэрэглэдэг учир эрэлт ихтэй гэнэ. Товчоор бол тус улсад очсон гадаадынхны хамгийн өргөн хэрэглээ болжээ. Энэхүү “tubing” гэгч нь манайхны хэлж заншсанаар “шагийн архи”-тай ойролцоо юм. Эрэлтэй учир ашиг харсан нутгийн наймаачид “шагийн архи”-аа метилийн спиртээр найруулах явдал сүүлийн үед газар аваад байгаа юм байна.

Энэ хэргийг зүйрлэвэл, 15 жилийн өмнө манай улсад гарсан “Азийн чоно” гэх дуулиант хэрэгтэй яг ижил юм. Тухайн үед буюу 2007-2008 онд шилжих үеэр Багануур дүүрэгт үйл ажиллагаа явуулдаг “Азийн чоно” компанийн метилийн спиртээр үйлдвэрлэсэн “хулхи” архинд хордсон 15 хүн амиа алдаж, 22 хүний биеийн байдал муудан эмнэлэгт хүргэгдэж байсан билээ. Тиймээс, Монгол Улсын иргэдийг Лаос болон түүний ойролцоох улсуудад аялал, зугаалгаар зорчихдоо “tubing” болон түүнтэй төстэй “шагийн архи” худалдан авч хэрэглэхгүй байхыг shugeluleegch.mn-ийн зүгээс та бүхэнд сэрэмжлүүлж байна.