Энэ сарын 01-нээс хэрэгжиж эхэлсэн “Эм, эмнэлгийн хэрэгслийн тухай хуулийн шинэчлэл”-ээр ихэнх эмийг зөвхөн эмчийн жороор олгох болсноос үүдэлтэй маргаан иргэдийн дунд их гарах болсон. Жишээ нь, эмчийн зөвшөөрөлгүйгээр харшлын эм авч чадахгүйд хүрсэн харшлын өвчтөнүүд хүндхэн байдалд ороод байгаа тухай гомдол их гарч байна. Гэхдээ хууль хэрэгжиж эхэлснээр бүх эмийг эмчийн жороор олгоно гэдэг ташаа ойлголт үүссэн гэж Эм, эмнэлгийн хэрэгслийн хянах, зохицуулах газраас мэдээлж, залруулга гаргажээ.
"Манай Улсад эмийг эмчийн жороор олгох хуулийн зохицуулалт 1998 оноос хойш хэрэгжиж, эмийн бүртгэлд орсон нийт 4,110 эмээс 2,800 гаруй эм жороор олгож, 100 орчим эм эмнэлгийн нөхцөлд хэрэглэх заалттай. Харин 1,100 гаруй нь жоргүйгээр эмийн сангаас хэвийн олгож байгаа. Эм, эмнэлгийн хэрэгслийн тухай хуулийг шинэчлэн баталсантай холбогдуулан жороор олгох эмийн талаар ямар нэгэн шинэ журам гаргаагүй тул хуульд заасны дагуу жороор олгох эмийг эмчийн бичсэн жороор эмийн сангаас олгох болохыг анхааруулж байна" гэв. Үндсэндээ, өмнө нь эмчийн жоргүй олгодог байсан эмүүдийг иргэд чөлөөтэй худалдан авах боломжтой гэсэн үг юм.