Монголын нутгаар дайруулж байгалийн хийн хоолой барих эсэх нь тодорхойгүй, их гүрнүүдийн аманд хүлхэгдэж байхтай зэрэгцээд өөр нэг төсөл яригдаж эхэллээ. Энэ бол Оросын нутгаар дайруулсан хурдны замын төсөл бүр тодруулбал Монгол-Казахстаныг холбосон хурдны зам юм. Хэдийгээр энэ төсөл мөн л олон жил яригдаж байгаа ч ОХУ-ын талаас зөвшөөрөл өгөхгүй байсаар өнөөтэй золгожээ. Яг одоогийн байдлаар Казахстаны Усть-Каменогорскыг холбосон 189 км замыг аль хэдийнэ барьчихаад байна.

Казахстанд өдий төдий км барьчихсан энэ төслийг урагшлуулахаар өнгөрсөн долоодугаар сард Казахстан, Монгол хоёр улсын төрийн тэргүүн нар ШХАБ-ын уулзалтын үеэр хэлэлцсэн юм. Хэрэв энэ зам ашиглалтад орвол Монгол-Казахстаны худалдааны эргэлт нэмэгдээд зогсохгүй, соёлын харилцаа ч өргөжих ёстой. Одоогийн байдлаар хоёр улсын нефть бүтээгдэхүүний экспортын хэмжээ 100 сая ам.доллароор хэмжигдэж байна. Цаашлаад энэ талын экспортыг 500 сая ам.долларт хүргэхээр зорьж байна. Хоёр улсын хооронд хэлэлцэж байгаа маршрут нь Казахстаны Усть-Каменогорс-Риддер хотуудыг холбон ОХУ-ын Алтайн бүгд найрамдах улсын Туэкта суурин хүрч, цаашлаад Монгол руу нэвтрэх юм. Энэ маршрутын ихэнх хэсэг нь ОХУ-ын нутгаар дайрах тул Оросын эрх баригчдын зөвшөөрлийг хүлээж байгаа нь энэ. Хурдны замын нийт урт 1604 км-ээр хэмжигдэж байна.

Ташрамд дурдахад Казахстан улсын Ерөнхийлөгч Кассым Жомарт Токаев энэ сард Монгол Улсад айлчлахаар төлөвлөж байна.