НОБГ-ын Гамшгаас урьдчилан сэргийлэх хэлтсийн мэргэжилтэн, ахмад Э.О есдүгээр сарын 28-ны бямба гарагийн үдэш бусдад зодуулж амиа алдсан хэрэгт холбогдуулж хэлтсийн даргаар нь ажиллаж байсан Г.Н-г шалгаж эхэлсэн байна. Талийгаач гавал, тархины гэмтлийн улмаас нас нөгчсөн аж. Энэ харамсалтай хэрэг даргынхаа албан тушаал ахиж, өөр ажилд томилогдон шилжих болсны "баяр"-ыг тэмдэглэж, үдэлтийн "шоу" зохиосноос үүдэлтэй гэнэ. НОБГ-ын Гамшгаас урьдчилан сэргийлэх хэлтсийнхэн болон есөн дүүргийн Гамшгаас урьдчилан сэргийлэх ажил хариуцсан мэргэжилтнүүд есдүгээр сарын 28-ны өдөр Чингэлтэй дүүргийн 4-р хорооны нутаг дахь "Элегансе" гэдэг бааранд цуглан уг арга хэмжээг тэмдэглэсэн юм байна. Тухайн оройнхоо 22:00 цагийн үед талийгаач Э.О болон түүнтэй хамт ажилладаг Ц.Э, Г.Н, Р.М, Х.Б гэсэн НОБГ-ын мэргэжилтнүүд уг баарнаас хамт гарсан гэнэ. Удалгүй тэдний хооронд маргаан дэгдэж, Э.О толгойдоо цохиулж гэмтжээ. Энэ хэрэгт холбогдуулж хэлтсийн даргаар ажиллаж байсан хурандаа Г.Н-г болон хамт явсан хүмүүсийг шалгаж байна.