Урин дулааны улирал, тэр дундаа аялал зугаалгын саруудад осол гэмтлийн тохиолдол эрс нэмэгдэж, энэ хэрээр эмнэлгүүдийн ачаалал ихэсдэг. Тодруулбал, 2024 оны эхний зургаан сарын байдлаар  ГССҮТ-ийн яаралтай тусламжийн тасагт нийт 87.596 хүн тусламж үйлчилгээ авсан байна. Үүнээс эрэгтэй 56.9 хувь нь эмэгтэй 43.1 хувь нь эрэгтэй байгаа бол, 0-18 насны хүүхэд 42 хувийг эзэлж байна.

Осол гэмтлийн тэргүүлэх шалтгаанийг авч үзвэл:

• Зам тээврийн осол -7823
• Унаж бэртэх /бүх төрлийн уналт буюу явганаас бүдрэх, ор болон шат, гуу жалга, унаа тэрэг, барилга байгууламжаас унаж бэртсэн/ -42.952
• Амьгүй механик хүчин зүйлд өртөх /Шил шаазан, хутга мэс болон бусад эд зүйлд өртөж гэмтсэн/ -15.007
• Амьтай механик хүчинд зүйлд өртөх /Нохой, муур, морь, мал, хүнд хазуулах/ -8114
• Хүчирхийлэлтэй холбоотой бэртэл гэмтэл /Ахуйн хүрээний болон гэр бүлийн маргаан, зодоон цохион, архи дарс хэтрүүлэн хэрэглэснээс үүдэлтэй/ -6570
• Халуун дулаан бодист өртөх буюу түлэгдэж гэмтсэн -2418
• Нохойд хазуулсан -1664 байна.

ГССҮТ-ийн Яаралтай тусламжийн тасгийн их эмч Б.Наранхүү "Аялал зугаалгын саруудад бага насны хүүхдэд тавих хараа хяналтаа сайжруулах, хорхог боодог хийх болон бусад төрлийн идээ ундааг бэлтгэхдээ өөрсдийн болон ойр тойрны хүмүүсийн аюулгүй байдлыг хангаж, түлэгдэж гэмтэхээс сэргийлэх шаардлагатай байна. Мөн гол ус, нуур цөөрмийн дэргэд анхаарал болгоомжтой байж, аялал зугаалах нь хамгийн чухал юм. Баяр наадмын өдрүүдэд гарсан осол гэмтлийн дийлэнх шалтгаан нь архи дарс хэтрүүлэн хэрэглэснээс үүдэлтэй байдаг бөгөөд өнгөрсөн 2023 оны долдугаар сард ахуйн хүрээний архидалттай холбоотой зодоон, гэр бүлийн хүчирхийлэлд өртсөн 104 хүн ГССҮТ-д тусламж үйлчилгээ авсан. Мөн хөдөө орон нутагт зорчих тохиолдолд тээврийн хэрэгслийн бүрэн бүтэн байдлыг шалгах, авто замын хөдөлгөөнд анхаарал болгоомжтой оролцох, тээврийн хэрэгсэл жолоодох үедээ архи согтууруулах ундааг хэрэглэхгүй байх, зам тээврийн ослоос урьдчилан сэргийлэхийг зөвлөж байна" гэв.