Фейсбүүк, Инстаграм хэрэглэдэг хүн бүрийн “дарга” гэж болох Мета компанийн захирал Марк Цукерберг тийм ч амар хүн биш. Хувийн амьдралаа нууцалж, хөндлөнгийн хараанаас маш сайн далдалж чаддаг тэр 22,000 долларын торгууль төлсөн ч албаныхны үгэнд орсонгүй. Учир нь, тэрбээр 300 сая долларын үнэтэй “Launchpad” гэх тансаг зэрэглэлийн усан онгоцоороо задгай далайд зугаалж яваа бөгөөд олны анхааралд өртөхөөс сэргийлэн байрлал заагч төхөөрөмжийг нь салгажээ. Гэвч энэ нь далай, тэнгисийн журамд үл нийцэх үйлдэл тул Испанийн далайн захиргааны газрынхан уг зөрчлийг илрүүлж, торгууль тавьсан ч М.Цукерберг дахиад л байрлал заагч төхөөрөмжөө унтрааж орхисноор сураггүй болсон байна. Хэвлэлүүдийн мэдээлснээр тэр одоо Газар дундын тэнгис орчимд зугаалж яваа гэж холбогдох албаныхан таамаглаж байгаа юм байна.