Гадаад улсад оршин сууж буй Монгол Улсын иргэд УИХ-ын ээлжит сонгуульд саналаа өгч эхэллээ. Гадаадад оршин сууж буй монголчууд УИХ-ын сонгуульд жагсаалтаар дэвшсэн 48 гишүүнийг хувь тэнцүүлэн төлөөлөх аргаар буюу нам, эвсэлд саналаа өгнө.

Монгол Улс одоогийн байдлаар 37 улсад төлөөлөгчийн газартайгаас 34 улсад оршин сууж буй 13.95 мянган иргэн УИХ-ын сонгуульд саналаа өгөхөөр бүртгүүлснийг СЕХ мэдээлсэн юм. Санал өгөх бүртгэлийн цахимаар зохион байгуулснаар 2012 оны сонгуультай харьцуулахад санал өгөхөөр бүртгүүлсэн иргэдийн тоо гурав дахин нэмэгджээ.

Энэ удаагийн БНСУ-аас хамгийн олон буюу 2983 иргэн, АНУ-аас 1862 иргэн, Японоос 1441 иргэн бүртгүүлсэн бол Австралиас 1282 бүртгүүлсэн байна. Сонгуульд саналаа өгөхөөр нийт бүртгүүлсэн сонгогчдын 50 орчим хувийг 20-34 насныхан эзэлж байгаа аж.

Үндэсний статистикийн хороооны мэдээллээс харахад энэ оны байдлаар дэлхийн 172 улсад 141 мянга гаруй монгол иргэн оршин сууж байгаа аж. Монгол Улс УИХ-ын 2012 оны сонгуулиас эхлэн гадаад улсад суугаа иргэдийн саналыг авч эхэлсэн юм.