Сонгуулийн сурталчилгаат аян эхлэхээр аймаар, аймаар явдал газар авдаг. Нэгнээ “хужаа, эрлийз, хурлийз”-аар нь дуудах, хулгайч, луйварчин, алуурчин, талуурчин, тагнуулч, хорчингоор нь цоллох энүүхэнд. Цирк дүүрэн алиалагчид суулгачихсан аятай л хошиг шог. Гадаадын эзлэн түрэмгийллээр далайлгаж, баахан хаос үүсгэх нь ч бий. Сонгуультай жилд есөн шидийн хог үзсээр уджээ, бид.

Энэ жилийн сонгууль л гэхэд социалист коммунист хандлага ажиглагдсанаар эхэлсэн нь юутай аюумшигтай. Дотор ч харанхуйлах шиг. МАН-ын дарга, Ерөнхий сайд Л.Оюун-Эрдэнэ Шинжлэх ухааны академи, Монгол үйлдвэрчний эвлэлийн холбооны Ерөнхийлөгчидтэй уулзаж, “Хамтран ажиллах санамж бичиг” байгуулснаас эхтэй юм. Монголын төр шинжлэх ухаанч болох зорилго тавьж, эрдэмтэн мэргэдийн дуу хоолойг хүргэж, тэдний толгойг ашиглахын тулд ШУА-ийн Ерөнхийлөгч Д.Рэгдэлийг намын жагсаалтаар өөд нь татлаа. Хөдөлмөрчдийн дуу хоолойг дээш хүргэхийн тулд МҮЭХ-ноос өөрсдөө санаачлан хамтран ажиллах саналыг хүргүүлж, тус холбооны Ерөнхийлөгч С.Эрдэнбат УИХ-д нэр дэвшиж явна. Санал хүргүүлэх ч гэж дээ дээрээс өгсөн заавар л байх.

Өнгөцхөн харахад аятайхан хэрэг боловч цаагуураа сонгогчдын массыг МАН хоёрхон суудлаар худалдаад авчихлаа. Ингээд Монголын тархи, хөдөлмөрчин олон МАН-ын атганд хуйгаараа яваад орчихов оо гэж...

Хамтын ажиллагааны санамж бичиг хэмээх халхавчлах стратегийн зорилго бол Монголын сонгогчдын дийлэнх хувийг эзлэх хөдөлмөр эрхлэгчдийн массыг эрдэмтэн мэргэдтэй нь атгаад авлаа. Нэгэнт л төлөөлөл нь дээшээ гарахаар болсон тул академийнхэн ч, үйлдвэрчний эвлэлийнхэн ч бүгдээрээ саналаа өгч дэмжих гэх нь гарцаагүй.

Намын татаасаар дээшээ гарсан улстөрчид сонгуулийн дараа ачийг нь хариулахын тулд өөрсдөдөө байгаа бүхий л нөөц бололцоог дайчлах нь мэдээж. Иргэдийн итгэлийг даасан олон эрдэмтэн, хөдөлмөр эрхэлдэг хүн бүрийг багтаасан үйлдвэрчний эвлэлүүд тийнхүү төрийн жолоодлогоор ажиллаад эхэлбэл соц-ком үеийн нэгдэлжих хөдөлгөөн шиг XXI зууны монголчуудыг нийгэмчлэх төлөвлөгөөт ажил болж хувирна!

За, эрх баригч нам нь тэнд тэгж явахад сөрөг хүчний төлөөлөл, улсын маань эв нэгдлийн бэлгэ тэмдэг явсан экс Ерөнхийлөгч Х.Баттулга Орхон, Хөвсгөл, Булганд нэр дэвшиж, сонгуулийн сурталчилгааны нээлтээ хийлээ. Энэ үеэр индэр дээрээс хэлсэн үг бүр аймаар санж. Тусгаар тогтнол минь нүдэн дээр унаад өнхрөх шиг...

Нэр дэвшигч Х.Баттулга: Өнөөдөр дэлхий дахины байдал ямар байгааг бид хэнээр ч хэлүүлэлтгүй мэдэж байгаа. Хойд хөрш маань дайнтай байна. Урд хөрш маань дэлхийн том гүрнүүдтэй эдийн засгийн байлдаад эхэлсэн. Бид хаана нь, хэнтэй нь, яаж оролцох вэ гэдгээ шийдэх түүхэн сонголт...

Орос дайнтай байгаа, үнэн. Хятад эдийн засаг нь тэлэхийн хэрээр дэлхийн томоохон тоглогчидтой мөнгөний дайн хийж байгаа нь ч бас үнэн. Харин бид “Женко”-гийн хэлсэн шиг аль нэг талд орох ёстой улс биш. Төвийг сахисан, гурав дагч хөршийн бодлого баримталдаг ардчилсан Монгол Улс юу дутлаа гэж аль нэг улсад дагаар орох билээ дээ?! Энэ сонгууль бол ирэх дөрвөн жилд улс орноо авч явах бодлого боловсруулагчдыг сонгох ёстой болохоос олон улсын тавцанд аль нэг талд зогсохыг шийдэх түүхэн доромжлол биш сэн. Хэн юу, ямар үг хэлснээс далд санаа нь цухалздаг шиг Х.Баттулга гуай хэний талд зогсохыг уриалаад байгаа нь ойлгомжтой.

Төмөр зам ярьж, монголыг талцуулан байж Ерөнхийлөгч болсон тэр биднийг тусгаар тогтнолоосоо сайн дураараа татгалзаж, Оросын республик болох сонголтыг хийгээрэй гж уриалж явна. Ядаж байхад “түүхэн” гэчихжээ. Даший шог!