“Malaysia Airlines”-ийн МН370 дугаартай нислэгийн онгоц алга болсон хэрэг бол дэлхийн агаарын тээврийн түүхэн дэх хамгийн учир битүүлэг хэрэг явдалын нэг билээ. Одоогоос арван жилийн өмнө буюу 2014 оны гуравдугаар сарын 08-ны өдөр 227 зорчигч, нислэгийн багийн 12 гишүүнтэй МН370 дугаартай нислэгийн Боинг 777 загварын онгоц БНХАУ-ын нийслэл Бээжин хотын зорин Куала Лумпурын Олон улсын нисэх онгоцны буудлаас хөөрсөн ч удалгүй нислэгийн удирдлагын төвөөс холбоо тасарсан. Ингээд дахин нэг цагийн дараа хиймэл дагуулын байрлал заагчтай уг онгоц Малайзын цэргийн радараас алга болсон байна. Албаныхан байдлыг ажигласан боловч МН370-р нислэг зорьсон чиглэлдээ хүрээгүй учир алга болсон гэж зарласан. Онгоцыг эрэн хайх олон улсын ажиллагааг хэдэн сарын турш зохион байгуулсан боловч сэг нь ч олдоогүй юм. Тиймээс гэмт этгээдүүд онгоцыг барьцаалан үл мэдэгдэх газарт аваачин нуусан гэх таамгийг дэвшүүлэх талууд ч бас байлаа.

Тэгвэл Иан Вильсон гэх технологийн мэргэжилтэн “Google Maps”-ыг ашиглан сураггүй болсон МН370 дугаартай нислэгийн онгоцны сэгийг олсон гэж мэдэгджээ. Тэрбээр хамгийн анх 2018 онд сураггүй болсон онгоц Камбожийн ширэнгэн ойд унасан гэх таамгийг дэвшүүлж байснаас гадна “Google Maps” дээр харагдах онгоцны сэг байж болзошгүй газар руу явах оролдлого хийсэн ч санхүүгийн хүндрэлийн улмаас бүтэлгүйтсэн учир таамгаа баталж чадаагүй гэв. Гэхдээ Иан Вильсон “Google Maps” дээр дахин дүн шинжилгээ хийж, өөрийнх нь таамаг зөв болохыг хэлээд орон нутгийн холбогдох албаныхан заасан газарт нь очиж, үзлэг хийхийг зөвлөжээ. Түүний хийсэн мэдээллээс харахад Камбожийн ширэнгэн ой дундаас уртаашаа 69 метр бүхий “цагаан зүйл” цухуйн харагдаж байгаа нь МН370 дугаартай онгоцны толгойноос сүүл хүртэлх зай бөгөөд Боинг 777 онгоцны урттай таарч байна гэв.