АНУ-ын Конгрессын танхим “ТикТок” аппликейшн америкийн иргэдийн мэдээллийн аюулгүй байдлыг хангаж чадахгүй байна гэх үндэслэлээр бүрэн хаах эсэхийг хэлэлцэх гэж байна. Ингэхдээ ойрын зургаан сарын дотор тус аппликейшний эзэмшигч “ByteDance” компаниас эзэмшлийн гэрээг цуцлах, АНУ-ын компаниудад эзэмших эрхээ шилжүүлсэн тохиолдолд Америкийн газар нутагт хориглохгүй байхаар тусгажээ.
 

Энэхүү хуулийн төслийг ирэх долоо хоногт АНУ-ын Төлөөлөгчдийн танхимд өргөн барихаар болжээ. Харин АНУ-ын Ерөнхийлөгч Жо Байден энэхүү хуулийн төсөл нь цагаа олсон хэрэг гэж дүгнээд хууль тогтоогчид дэмжвэл Ерөнхийлөгчийн хувьд санал нэгтэй байна гэдгээ илэрхийлсэн байна. Өнгөрсөн жилийн сүүлээр АНУ-ын Конгрессын танхим тус апплкейшний гүйцэтгэх захиралыг байлцуулан сонсгол зохион байгуулсан юм. Уг сонсголоор АНУ-ын Конгрессийн гишүүдийн дийлэнх нь мэдээллийн аюулгүй байдлыг хангаж чадахгүй байна гэж дүгнэсэн билээ. Хэдийгээр тус аппликейшний удирдлагууд үүнийг эрс эсэргүүцсэн ч АНУ-ын улстөрчдийн хувьд хэсэгчилж болон бүрэн хориг тавих ёстой гэсэн байр суурьтай байсан юм. Одоогоор АНУ-ын нутагт “ТикТок” ашигладаг 170 гаруй сая иргэн бий гэсэн судалгаа бий. Тус аппликейшн нь Инстаграмын дараа орох хамгийн их татагдсан нийгмийн сүлжээний аппликейшн болжээ.