Нийгмийн даатгалын байгууллага нь нийгмийн даатгалын үйлчилгээг даатгуулагчийн эрэлт, хэрэгцээнд нийцүүлэн шинэ шатанд гаргах, төрийн үйлчилгээг хүртээмжтэй, шуурхай болгох зорилтын хүрээнд цахим шилжилтийг үе шаттайгаар хэрэгжүүлж байна. Энэ хүрээнд Нийгмийн даатгалын сангаас олгох тэтгэврийн тухай хуулийн дагуу тэтгэвэр тогтоолгох даатгуулагч өөрөө тэтгэврээ бодох тооцоолуурыг системд нэвтрүүлэхээр ажиллаж байна.
Тодруулбал, иргэд, даатгуулагч өөрөө тэтгэврээ бодох тооцоолуурыг portal.ndaatgal.mn цахим системээр дамжуулан авах боломж бүрдэх бөгөөд дараах нөхцөлийг хангасан тохиолдолд Та өндөр насны тэтгэвэр тогтоолгох боломжтой. Үүнд:
- Тэтгэврийн даатгалын шимтгэлийг нийтдээ 20-иос доошгүй жил төлсөн төрсөн ондоо харгалзах тэтгэврийн нас (Жишээ нь: 1966 онд төрсөн эрэгтэй 62 нас 3 сар, 1971 онд төрсөн эмэгтэй 57 нас 3 сар гэх зэрэг)-нд  хүрсэн бол;
- Тэтгэврийн даатгалын шимтгэлийг 25-аас доошгүй жил төлсөн 60 насанд хүрсэн эрэгтэй, 55 насанд хүрсэн эмэгтэй;
- Төрүүлсэн болон гурав хүртэл настайд нь үрчлэн авсан дөрөв ба түүнээс дээш хүүхдээ зургаан нас хүртэл нь өсгөсөн тэтгэврийн даатгалын шимтгэлийг 20-иос доошгүй жил төлсөн 50 насанд хүрсэн эмэгтэй зэрэг болно.
Системийн хөгжүүлэлтийн талаар Нийгмийн даатгалын ерөнхий газрын дэргэдэх Мэдээллийн технологийн төвийн мэргэжилтнүүд удирдлагуудад танилцууллаа. Энэ үеэр Нийгмийн даатгалын ерөнхий газрын дарга Б.Батжаргал болон холбогдох газрын дарга, мэргэжилтнүүд системийн хэрэглээний хялбар байдал, хүртээмжийг нэмэгдүүлэх, тооцоолуурыг ойлгомжтой байдлаар шийдэж, хөгжүүлэлтийг хийхийг зөвлөлөө.