Эрчим хүчний яам, Монгол Улсын Хөгжлийн банк, Монголын банкны холбоо хамтран эрчим хүчний сүлжээний дэд бүтцийн найдвартай ажиллагааг хангах, дэмжих, тэргүүлэх чиглэлийн ач холбогдолтой төсөл, хөтөлбөрүүдийг санхүүжүүлэх боломжийг нэмэгдүүлэх зорилгоор өнөөдөр (2026.06.15) хамтын ажиллагааны санамж бичиг байгууллаа.

Эл санамж бичгийн хүрээнд эрчим хүчний салбарын тогтвортой хөгжлийг хангах, эх үүсвэрийг нэмэгдүүлэх, цахилгаан дамжуулах, түгээх сүлжээг шинэчлэх, үр ашиг бүхий санхүүжилтийн схем боловсруулахад хамтран ажиллах юм.

Санамж бичиг байгуулах үеэр Эрчим хүчний сайд Б.Найдалаа “Эрчим хүчний салбарт өргөн хүрээний шинэчлэлийн бодлого хэрэгжүүлж байгаа. Тодруулбал, 139 буюу нэг бодлого, гурван зарчмын хүрээнд есөн ажил хэрэгжүүлэхээр төлөвлөсөн. Зарим ажлыг нь хэдийн эхлүүлээд байгаа. Эрчим хүч бол Монгол Улсын хөгжлийн суурь салбар. Энэ салбарын төсөл, хөтөлбөр, дээрх төлөвлөгөөг хэрэгжүүлэхэд санхүүжилт хамгийн чухал.

Санамж бичгийн хүрээнд эрчим хүчний салбарыг чадавхжуулах, санхүүжилтийн схемийг илүү тодорхой болгоход хамтран ажиллана. Тухайлбал, төсөл, хөтөлбөрүүдэд зориулан хамгийн бага хүүтэй, хамгийн таатай нөхцөлтэй санхүүжилт олгох боломжийг эрэлхийлж, дотоод, гадаадын зах зээлд бонд гаргах чиглэлд хамтран ажиллана.

Өдгөө зарим айл өрх нарны панель, батарей хуримтлуур ашиглан эрчим хүч, дулааны хэрэглээгээ хангаж буй. Мөн Эрчим хүчний яамнаас таван аймагт нарны цахилгаан станц, батарей хуримтлуурын систем бүхий төслүүдийн сонгон шалгаруулалтыг зарлаад байна. Гүйцэтгэгчийг нь удахгүй шалгаруулна. Эдгээр болон томоохон төсөл, хөтөлбөрүүдийг хэрэгжүүлэхэд шаардлагатай санхүүжилтийг олгоход энэхүү санамж бичиг ач холбогдолтой” хэмээн онцоллоо.

Мөн Монгол Улсын Хөгжлийн банкны гүйцэтгэх захирлын үүрэг гүйцэтгэгч С.Баатарсүрэн “Эдийн засгийг тэлэхийн тулд шийдэх шаардлагатай асуудлын нэг нь эрчим хүчний салбарт тулгамдаж буй асуудал. Хөгжлийн банкны хувьд эдийн засгийн хөгжилд нөлөөтэй төслүүдийг дэмжих нь үйл ажиллагааны чиглэл байдаг. Цаашид эрчим хүч, тэр дундаа сэргээгдэх эрчим хүчний төсөл, хөтөлбөрүүд хэрэгжүүлэхэд зориулан олон улсын зах зээлээс хямд эх үүсвэр татахад анхаарч ажиллана” гэлээ.  

Түүнчлэн Монголын банкны холбооны ерөнхийлөгч О.Хүрэлбаатар “Монголын банкны холбооны Удирдах зөвлөлийн гишүүд өнгөрсөн долоо хоногт Эрчим хүчний сайдтай уулзсан. Тус уулзалтын үр дүнд хамтран ажиллах санамж бичгийг маш богино хугацаанд байгуулж байна. Монголын банкны холбоонд Хөгжлийн банк, арилжааны банкууд гишүүнчлэлтэй байдаг. Банкууд нэг нэгээрээ бус, нийлээд бодит салбарт оролцоогоо нэмэгдүүлж хамтран ажиллахаар болж байгааг онцолъё. Эрчим хүчний салбарыг хөгжүүлэхийн тулд бүхий л боломжийг эрэлхийлэн хамтран ажиллах болно. Ажлын хэсэг байгуулж, шуурхай ажиллана” хэмээн тодотгов.

Талууд цаашид эрчим хүчний хэмнэлт бүхий дэвшилт техник, технологи, шийдлийг дэмжин, ногоон санхүүжилтэд хамрагдах боломжтой төслүүдийг тодорхойлж, хямд эх үүсвэр, урт хугацаатай ногоон бонд, тогтвортой санхүүжилтийн эх үүсвэрийг татан төвлөрүүлэх үйл ажиллагааг өргөжүүлэхэд хамтран ажиллах юм. Хамтын ажиллагааны үр дүнд эрчим хүчний салбарын найдвартай, аюулгүй ажиллах нөхцөл бүрдүүлэх төсөл, хөтөлбөрүүдийн санхүүжилтийн боломж нэмэгдэж, хөрөнгө оруулалт татах нөхцөл сайжран, хараат байдлыг бууруулах замаар эдийн засгийн тогтвортой өсөлтийг дэмжих ач холбогдолтой.